Chiuta Dada, Buku la Msambizgi

1 4 6 /

CHIUTA DADA

Chiponosko ntcha banthu wose

Nkhwantha yakusanda Mazgu gha Chiuta ya chikatorika, Karl Rahner wakuphara pakweru kuti chifukwa chakuti Yesu wali kufwa pa mphinjika, wali kupereka chiponosko ku banthu wose mucharu chose chapasi. Mukaghanaghaniro kake, nyifwa ya Yesu Khristu njabanthu wose, mwantheura banthu wose na mbumba zose za banthu, kwali bakumuzomera Yesu kwali bakumukana, mbakuponoskeka chifukwa chakuti Yesu wali kufwira banthu wose. Kwali bakumanya za Yesu kwali chara, mbakuponoskeka. Unenesko ngwakuti mu Baibulo muli makani ghakuzomerezga kaghanaghaniro aka ako kakuzomerezga kuti banthu wose bali kuponoskeka, vilije kanthu kuti bakumanya panji chara. Chiponosko ntcha wali yose mucharu (cf. 1 Yohane 2.1-2; 4.14; 5.19; Yohane 1.29; 4.42; 11.51-52; 2 Bakorinto 5.18-21; Uvumbuzi 12.9, etc.). Kasi walipo uyo wangamanya kupanikizgira kufuma mu Baibulo kuti charu chose chili mundondomeko ya Chiuta pa uweme wake mwa Yesu Khristu kuti banthu wose baponoskeke pachifukwa cha nyifwa yake? Kasi banthu wose baponoskekenge panji bachoko waka awo mbakusoreka ndiwo baponoskekenge? Kasi pali sizgo wuli na fundo iyi ya chiponosko ntchabanthu wose nanga bangaleka kumuzomera panji kumumanya Yesu? Chiuta wakulongora uweme wake kwizira mu kabiro kake uweme wake wakufikapo, unenesko wake wakufikapo, na chitemwa chake chambura kumara. Wakulongora uweme wake wakufikapo kwizira mu utuba wake, urunji wake, na mukweruzgira kwake kwa urunji awkufikapo. Wakulongora unenesko wake wambura kumara kwizira mu kabiro kake kakuba wakufikapo, munenesko na wa magomezgeko. Pa umaliro, Chiuta wakulongora chitemwa chake kwizira muchitemwa chake cha myirayira, uchizi, lusungu na kuzizipizgira. Kupulikiska kabiro ka Chiuta muwukari wake, ntchakuzirwa chomene kwa ise usange tikukhumba kupulikiska ivyo Baibulo likusambizga pa makani gha kabiro ka Chiuta Dada wa nkhongono zose. Tikupulikiska chisambizgo chakuzirwa ichi pekhapekha usange tikumanya kuyaniska ukari wa Chiuta na uweme wake. Palije kuguzana pa kabiro ka Chiuta, pa kutemwa kwake na kukaripa kwake pakuti ndi Chiuta yumoza, mweneuyo wakutebeta nyengo zose, pali pose na munyengo zose mwakuba yumoza ndipo kabiro kake nkhakukoleranako. Chitemwa, uchizi na kweruzga kwake, vyose vili mwa iyo Chiuta yumoza pera.

3

Kulongosora fundo ya chisambizgo

4