Chiuta Dada, Buku la Msambizgi

/ 1 9 9

CHIUTA DADA

Kusanda Vyakulembeka (Mwakulutirizga)

Mu mazgu gha Paulosi mukalata wake wakulembekera ku baGalatiya mukuwoneka makani agha. Makani agha ghakuwonekaso mukalata wake wa ku mpingo wa Baroma apo wakuphara umo wakasuzgikira mukati mwake pakuwona kuti ba Yuda bakamba kusazgizga chipulikano: Chifukwa nchichi? Chifukwa ŵakakhumba kuŵa ŵarunji pa maso pa Chiuta pakupulikana chara, kweni pakugomezga milimo yawo. Ŵakakhuŵara pa libwe la chikhuŵazgo.” (Baroma 9:32). Paulosi kuti wakayowoyanga kuti chisopo cha chiYuda na maluso ghake vikaba vyakutimbanizga panji kuti maluso gha banthu bamtundu ndigho ghakaba ghaweme chara. Wakadidimizganga kuti chipulikano chakufumira mumtima ndicho ntchakwenelera mu mdauko wuli wose wa banthu na muchisopo chawo. Midauko kuti ndiyo yikwenelera kudangilira chara kweni chipulikano. Banthu bamtundu awo bakapokera chipulikano cha chikhristu bakenereranga chara kuba dankha baYuda panji kurondezga maluso gha baYuda kuti basange chiponosko. Paulosi wakati, mwakudidimizgapo, “16 Ine kuti ndili na soni na Uthenga Uweme chara chifukwa ndi nkhongono ya Chiuta yakuponoska wose awo ŵakupulikana, pakudanga ŵaYuda, pamanyuma ku ŵamitundu” (Baroma 1:16). Kwene chinthu chenekoneko kuti ntchakuti banthu wose balabiske midauko yawo na kuwona umo basazgizgana na chipulikano cha chikhristu, kweniso balabiske umo bangachitira na midauko ya banthu banyake. Apo chikhristu chikukanana na midauko ya banthu, bakhristu bakwenera kufumyamo midauko yakukanana na chisopo ndipo apo vikukoleranako bakwenera kuvibika pamoza. Chikhristu chikafumira kumaro ghakupambanapambana na maluso gha banthu gha kupambanapambana. Chikhristu chikaruta kumaro ghakulekanalekana na kuya kapangiska banthu kupulikana na kutolera maluso gha uko chili kufumira na banthu bake. Apo chikafika ku Amereka chikatora maluso nga ndi Mboni za Yehova, na vinyakhe vyantheura, vinyake vikakoleranako na Baibulo ndipo vinyake vikaba kuwaro kwa Mazgu gha Chiuta. Umu ndimo vikubiraso mu malo agho bakutumika barutamo: vipulikano na vyakuchitika vinandi vikuchitika. Fundo njakuti Uthenga uweme upulikikwe makora kubanthu ndipo wube wakupokelereka kwambura chirendo chomene. Ntchiweme chara kuti uthenga wube wakuvungika mu midauko na maluso gha banthu awo biza nawo. Mlembi H. Richard Niebhur, mu buku lake la Social Sources of Denominationalism, wakumanyikwa na fundo yake yakuti mipingo yakupambanapambana kuti yili kupambana waka visambizgo na vipulikano chara (nanga wuli mphambano