Kurwa nkhondo ya Chipurikano

138 • Kurwa nkhondo yiweme ya Chipurikano

9. Tingagongowanga chara usange tikujumpha mukuyezgeka, kwene tikwenera kuchipima kuba chimwemwe chikuru, pakumanya kuti Chiuta wati wavitebeteskenge kutikhwimiska, wati watipenge vinjeru kuti timanye kutonda chiri chose icho tikumanenge nacho. Bazgani Yakobe 1.2-8 ndipo muzgore mafumbo ghakurondezgapo: a. kasi tikwenera kuchitachi usange tikukumana na masuzgo ghakupambana-pambana? (v. 2)

b. Chikuchitika ntchivichi usange kukhora kwapambika ivyo vikukhumbikwa? (v. 4)

c. Usange tasoba mahara munyengo ya masuzgo, tikwenera kuchitachi, kasi Chiuta wakutisambizga kuti wuri? (vv. 5-8)

Nga mbakurwa nkhondo yiweme yachipurikano, baweme, tiri kuchemekera kukuzizipizga, kukoserezga mpaka kuwumaliro. Kuzizipizga nkujumpha muchinthu icho chikukusobeska mtende kwambura kuchireka panji kuchimbiramo. Nga mbakhristu awo bakumutebetera Chiuta mucharu icho ntchakuhaba na masuzgo, tikusangana na visuzgo vinandi mucharu kwizira muvinthu na maruso ghamucharu, mathupi ghithu na mawubendezi agho ghakurimbana nase nyengo na nyengo. Charu chikutipurikiska chara na umo tikukharira na kwendeskera vinthu. Muvyose ivi tikwenera kuzizipizga na kurimbarimba mu vyose. Tikunyekezgeka, tikusangana na mawunono ghanandi chomene, kwene muvyose ivi tikwenera kusangwa munyengo zose apo tikurimbana navyo vyose ivi, pakumanya kuti Fumu yitebeteskenga vyose ivi pakutichitira uweme munyengo zose apo tikurindizga kuvivya kwake. Kurimbarimba nkhurimbikira kwambura kudonda muchipurikano, apo tikukoreska utozi na chikanga kwambura nkhayiko. Kanandi tikubavye kumanya chifukwa icho tikuyezgekera, kwene tikumugomezga Chiuta munyengo zose. Tikwenera kukana chinthu chiri chose icho chingatiguzira kutari na Chiuta. Kuzizipizga nkhugomezga Chiuta mu nkhongono zake, kusangika kwake mukujipereka kwithu kwa iyo. Apo tikujumpha muviyezgo, tingaba na chikanga kuti Chiuta watipenge vyose ivyo tikupenja pa umoyo withu, kwizira mubakupurikana banyithu, marurombo ghithu mwakovwirika na Mzimu Mtuba, na mukubazga Mazgu gha Chiuta. Apo mukumarizga chisambizgo ichi, manyani kuti ichi ntchiyambi waka. Mukwenerera kurekera panthowa chara panji kudewezga kachitiro kavinthu. Muyime nganganga, apo mukumurekera Chiuta kuti wafiske ivyo wari kurayizga kubakupurikana wose.

Mwawufupi