Ufumu wa Chiuta, Buku la Msambiri

/ 5

UFUMU WA CHIUTA

Jando: Kunjizganamo muvisambizgo

Tikumutawuzgani Mzina la nkhongono zose la Yesu Khristu! Pa visambizgo na ma upharazgi ghose agho Yesu wa ku Nazareti wakasambizga na kupharazga, palije ivyo ndi vyakuzirwa na vyakuwuska mphindano kuluska chisambizgo cha Ufumu wa Chiuta. Basambiri wose bakupulikana kuti chisambizgo icho Yesu wakabikapo mtima chomene, icho wakasambizga na kupharazgapo chomene, ntchisambizgo cha Ufumu wa Chiuta. Chikaba chisambizgo chake cha chiponosko, ndondomeko yake yikuru, na chisambizgo cha mtima wake nkhanira. Mwachitima chomene, mpingo wasono ukuwoneka kuti ukubikapo mtima chara pa ivyo Yesu wakabikapo mitma kuti ndi vyakuzirwa chomene pa utebeti na uchimi wake pakuba Mesiya. Chigomezgo chithu ntchakuti mtima winu ukorekenge na uthenga wa Ufumu wa Chiuta, Fumu na Ufumu wake, nakutiso muwone kuzirwa kwake pa umoyo withu nga mbasambiri ba Yesu Khristu na batebeti ba uthenga wa Chiponosko. Muchisambizgo chakwamba na chachibiri tilabiskenge pa mutu wa Kugarukirika kwa Ufumu wa Chiuta na Kukhazikiskika kwa Ufumu wa Chiuta . Pachifukwa cha ku uchigaruka na kuwa kwa munthu, Chiuta wakuzgoka kuba wakumurwera munthu na urato wakumuwezgereska kwa iyo mwene. Chiuta wapangana na Abrahamu pakuphara pakweru kuti wizenge na mponoski kwizira mu mbumba yake. Mponoski mweneuyu ndiyo wizenge na Mtende ( Shalom ) na urunji mcharu. Phangano ili likawerezgekaso kuperekeka kwizira mwa Isake na Yakobe ku bana ba Israyeli, ku mtundu wa Yuda, ndipo pa umaliro kwa Davide. Apa tikulondora mkoka wa Mesiya, umo kuwusa kwa Chiuta kuti kwizirenge na kuwezgekera mucharu ichi icho ntcha kutembeka na chakuwa. Yesu wa ku Nazareti ndiyo ndi kusangika kwa Ufumu wa Chiuta wenewuwo ngwakufiskika, apo kuwusa kwa Ufumu wa Chiuta ukuwoneka kwizira mukwiza kwake mucharu mu wunthu, kufwa kwake, kuwuka kwake ku bakufwa na kukwerera kwake kuya kuchanya. Chisambizgo cha chitatu na cha chinayi vikulabiska pa mitu yakuti Kunjilira kwa Ufumu wa Chiuta na Kufiskika kwa Ufumu wa Chiuta . Sono pakuti Fumu yithu Yesu Khristu wali kufwa, kuwuka kubakufwa, na kukwelera kuchanya, Ufumu wa Chiuta ukulutilira kupharazgika kwizira mu Mpingo wake. Mpingo wa Khristu Yesu ndiwo ndi ntchindamira panji kuti malo agho mukufumira makani gha chiponosko, na uko kukufumira nkhongono za Chiuta. Ndiko kuli Mtende wa Ufumu wa Chiuta, mao gheneagho kusangika kwa Chiuta na nkhongono zake vikuwonekera. Ufumu wa Chiuta uzamkukhazikika apo Yesu wati wizirenge kachibiri, apo nyifwa, matenda, na uheni wose, viti viparanyikenge kwamyirayira.