Kurwa nkhondo ya Chipurikano

Ndondomeko 159

7. 1 Bakorinte 10.31 – Tiri banangwa mwa Khristu Yesu, ndipo tiri kupika wanangwa uwu mwakuti tikwenera kumukuzga Chiuta muvinthu vyose ivyo tikuchita, kwari mpha chakurya, kumwa, na chiri chose icho tikuchita. 8. 1 Bakorinte 10.32-33 – Tiri banangwa mwa Khristu, ndipo tikwenera kutebeteska wanangwa withu mukarikose mwakuti tireke kukhubazga banthu mucharu panji mumpingo, kwene tichite icho tikwenera kuchita mwakuti tikuzge na kuchiska banthu kuti bamumanye na kumutemwa Yesu, mwakuti baponoskeke. Mwakusazgirako ku fundo izi, nkhugomezga kuti tikwenera kudidimizga fundo izi: • 1 Petros. 2.16 – Tikwenera kukhalirira mu wanangwa withu mwa Yesu Khristu, kwene tikwenera kuchenjera chomene mwakuti wanangwa withu ukwenera kuba wakuchitira uheni chara. • Yohane 8.31-32 – Tijirongore kuba basambiri ba Yesu Khristu apo tikukharirira na kurondezga Mazgu ghake, mukuchita ntheura, tikumanya unenesko, ndipo wanangwa ukutizgora ise kuba wanangwa. • Bagalatiya 5.13 – Nga mbabare na badumbu mwa Khristu, tiri kuchemekera kuwanangwa, kwene kuti ndi wanangwa kukachita uheni chara; kwene, kuti tikatebeterane yumoza na munyake muchitemwa. Pa kurabiska pa wanangwa withu uwu, mukaghanaghaniro kane, nkhurabiska vinthu ivyo tikubapharira banthu, bachoko na barara. Kanandinandi, ivyo tikubaphalira awo bazgoka sono, nkhwizira mufundo na ndondomeko zakubanjirikizga vinthu ivyo bakwenera kuchita na kureka, nyengo zinyake vinthu ivi vikubasambizga kuti chikhristu ntchisopo chakukanizga banthu kuchita vinthu nakutiso ntchisopo icho chikudidimizga chomene pakurekeska banthu kureka kwanangwa. Unenesko ngwakuti, chikhristu chikwimilira chomene pawanangwa withu, wanangwa wene uwo wuri kupika kwa ise kufumira kwa Chiuta mwa Yesu Khristu, wanangwa wakukhazikika muchitemwa, wakutemwa kuthuwuska Ufumu wa Chiuta, wakukhara umoyo wakujipereka kwa Chiuta. Utebeteti ukuru chomene wa mipingo ya mu matawuni ngwakuti bakhristu bakhare umoyo wakumopa Chiuta na kuphara kubanthu ivyo Chiuta wari kuchita mwa Yesu Khristu, kuwombora banthu, mwakuti banthu bamumanye Yesu ndipo bamutemwe na kumurondezga. Wanangwa uwu ngwakutorera banthu kukwananga chara.