Mtaala wa Cornerstone, Kitabu cha Mwanafunzi

UTANGUL I Z I WA FUNGU LA MASOMO YA B I B L I A / 79

Utangulizi wa Fungu la Masomo ya Biblia

Salamu, marafiki wapendwa, katika Jina lenye nguvu la Yesu Kristo! Karibu kwenye fungu la kwanza la Mtaala wa Cornerstone, Mafunzo ya Biblia. Kulingana na ushuhuda wa wazi wa Maandiko yenyewe, Mungu huwaandaa wawakilishi wake kupitia Neno la Mungu lililovuviwa na Roho Mtakatifu, yaani Maandiko. Kila mtu ambaye Mungu anamwita katika huduma lazima adhamirie kujinidhamisha ili aweze kuwa mahiri katika Neno, kutii maagizo ya Neno, na kufundisha kweli ya Neno la Mungu. Kama mtenda kazi, lazima ajitahidi kutumia kwa halali Neno la kweli, na hivyo kukubaliwa na Bwana katika jitihada zake kujifunza (2 Tim. 2:15). Kama wanafunzi wa Yesu Kristo, tunathibitisha imani yetu ya kina katika nguvu zilizo katika Neno la Mungu kwa ajili ya uumbaji, kusadikisha, kugeuza na kuwaita watu katika utumishi. Ili kuelewa baraka ya ajabu ya uongofu na wito, tutahitaji kutathmini kwa kina nafasi ya Neno la Mungu katika Kanisa. Somo letu la kwanza, Uongofu na Wito: Neno Linaloumba , linachunguza asili ya Maandiko Matakatifu kama Neno la Mungu kama njia ambayo Roho Mtakatifu anaumba maisha mapya kwa wale wanaoamini. Tunathibitisha kuwa wanafunzi kwa kudumu katika Neno la Yesu. Kama washiriki wa Kanisa tunapokea Neno pamoja katika jumuiya, lile lile linalotupatia kusudi kuu la ulimwengu ulioumbwa, ambalo ni utukufu wa Mwenyezi Mungu. Katika somo letu la pili, Kutafsiri Biblia: Mbinu ya Hatua Tatu , tutatambulisha mbinu mwafaka ya ufasiri wa kibiblia iliyoundwa ili kukusaidia kuziba pengo kati ya ulimwengu wa kale na ulimwengu wetu wa sasa unapojifunza Biblia. Tunaita mbinu hii “Mbinu ya Hatua Tatu”: yaani elewa hadhira asilia, gundua kanuni za jumla, na husianisha kanuni na maisha. Hoja ya pekee ya Biblia yenyewe kwamba ina nguvu ya kubadilisha maisha inapaswa kuwa sababu ya kutosha kutupatia changamoto ya kulifahamu Neno la Mungu. “Kila andiko, lenye pumzi ya Mungu, lafaa kwa mafundisho, na kwa kuwaonya watu makosa yao, na kwa kuwaongoza, na kwa kuwaadibisha katika haki; 17 ili mtu wa Mungu awe kamili, amekamilishwa apate kutenda kila tendo jema.” 2 Tim. 3:16-17. Neno la Mungu lenye pumzi ya Mungu lililowasilishwa kupitia maneno ya wanadamu linatosha kututajirisha, kutufurahisha, na kutupa uwezo na ujuzi kwa ajili ya kila kazi njema. Kwa kweli, Neno la Mungu haliwezi kubatilishwa, sikuzote litatimiza kusudi lake,