Chiuta Mwana, Buku la Msambizgi

/ 8 1

CHIUTA MWANA

Kasi wangaba kuti wali kwiza?

Kuti munthu wamanye kulongosora makora nkhani ya Chiuta wakwenera kutebeteska maghanoghano ghake makora pakulabiska makora ivyo Chiuta wali kutipa. Para tikudumbirana kabiro ka ulato wa Chiuta na kwiza kwa Yesu Khristu mucharu (incarnation), tikwenera kulabiska makora chomene kwenelera na kuzirwa kwa kwiza kwa Yesu mucharu. Tikwenera tizgore makora fumbo lakuti kasi kwiza kwa Yesu mucharu kukaba kwakwenelera na kwakuzirwa wuli kwa ise tabanthu? Tikwenera tijifumbe kuti, kasi ntchifukwa wuli kwiza kwa Yesu mucharu kuli kwakwenelera? Kasi Yesu wa ku Nazareti wakati wizenge mucharu usange Adamu wakabengevye kwananga, mwakuti banthu bakalekenge kukhumbikwa muthaski? Banji banth bakuwona kuti kulamphalampha na kuzgora mafumbo agha nkhwambura chanduro pa chikhristu chifukwa vinthu vyose vya muchindindi ndi vyake vya Chiuta (Marango gha Chibiri 29.29). Chinthu chinyake icho banji bakupulikana nacho ntchakuti, tikwenera kumanya kuti kaghanaghaniro aka nkhakwenelera chomene tikwenera kuranguruka na kurwa na maghanoghano ghithu apo tikuwonaso ivyo Baibulo likutisambizga pa vinthu vinonono ngati ndi ivi (1 Petrosi. 1.10-12). Utebeti wakwambira mukati ngwakukhumbikira chomene pa utebeti wa madazi ghano. Vyaru vinandi lero vyakusuzga kurutako na ivangeli la Yesu. Banthu banandi bachipulikano cha chisilamu na Buddah bakumupokera Yesu, kweni bakusungilira midauko yawo na maluso ghakachitiro ka vinthu pa umoyo wawo. Banandi ba chisopo cha Buddhists na chi Silamu bakuzomera kunjira chisopo cha chikhristu kweni bakukana kuchemeka bakhristu chifukwa chakuti chikhristu chikuyana waka na kabiro ka bazungu. Bakukana kuzuwukamo mumaluso na midauko ya banthu bakwawo. Kufikira banthu bantheura aba kukhumbikwa kuti bakutumika pakati pa banthu aba kakukhumbikwa kudankha bayanana nawo banthu awa, kubachiska kukhara pamoza na babare bawo mwakuti babafikire mwawupusu na uthenga wachiponosko. Umo ndimo bakachitira Bapostole na bakhristu bakudankha. Bakafumamo mukachitiro kavinthu chara kweni bakakhara mwenemumo na kumusopa Chiuta pamoza na banthu bakwawo. Kasi imwe mukuwona kuti vikuyana na umo Yesu wakatolera lwande lithu, tabanthu bakwananga mwakuti watithaske kukwananga? Kudewezga Chipulikano panji kukozgana na banthu bakwananga?

2

2

3